Shenjat e para të kancerit mund të shfaqen vite ose dekada para diagnostikimit me kancer, kjo sipas studimit më gjithëpërfshirës deri më sot mbi mutacionet gjenetike që shkaktojnë transformimin e qelizave të shëndetshme në qeliza malinje.

Të dhënat e marra nga 2500 mostra tumori të 38 llojeve të ndryshme të kancerit, tregojnë për një mundësi të identifikimit të kancerit shumë kohë para diagnozës, çka do të bënte të mundur trajtimin në faza të hershme të sëmundjes.

Studimi  është kryer në kuadër të projektit mbi analizën gjenetike të gjithë gjenomit (Pan-Cancer Analysis of Whole Genomes).

Gjetja më interesante e këtij studimi është se si ndryshimet gjenetike ndodhin shumë vite më para diagnostikimit, apo shfaqjes së simptomave të para të sëmundjes.

Këto të dhëna japin mundësinë e zhvillimit të testeve të reja diagnostikuese, të cilat mund të mundësojnë identifikimin e sëmundjes në faza kur sëmundja është e kufizuar në nivel qelizor.


Mënyra se si kjo do të mund të realizohet në të ardhmen është me anë të ashtuquajturave biopsive likuide – të cilat janë teste gjenetike që detektojnë mutacione në ADN-në qarkulluese në gjak, çka mund të tregojë prezencën e tumorit në trup.

Pas identifikimit të këtyre mutacioneve në gjak, do të mund të përdoren teste imazherike shumë sensitive, të cilat do të mund të identifikojnë dhe tumorin e origjinës, pavarësisht përmasave të tij.

Ekipi kërkimor ka zbuluar se tumoret të cilat shfaqen më para në kohë këto mutacione janë kanceri i ovarit, glioblastoma dhe meduloblastoma.

Studimi është publikuar në Nature, si pjesë e projektit mbi analizën e plotë të gjenomit – Pan-Cancer.


Kanceri i gjirit dhe mutacioni në gjeni përgjegjës BRCA. A mund të jeni mbartës?