Niveli i ulët i glukozës në gjak (i njohur si hipoglicemia) është një shqetësim për këdo që trajtohet për diabet. Mund të ndodh kur merr më shumë insulinë, nuk ha mjaftueshëm, ose ushtrohesh më shumë se zakonisht. Mund të ndodh edhe kur bën maksimumin për menaxhimin e diabetit.

Ndaj, është e rëndësishme të dish të gjitha shenjat paralajmëruese. Është e rëndësishme që këto shenja të njihen edhe nga familjarët dhe miqtë.

Cila është vlera e ulët?


Shumica e njerëzve kanë simptoma kur niveli i glukozës në gjak bie nën 70 mg/dl. Por nuk është njësoj për të gjithë. Mund të ndjeni të dridhura në trup edhe në nivele më të larta të glukozës se kjo. Me kohën do të kuptoni vet se cila është vlera shqetësuese për ju.

Cilat janë simptomat?


Edhe kur niveli i glukozës në gjak bie vetëm minimalisht, mund të ndiheni nervoz dhe ankthioz. Kjo ndodh për shkak të adrenalinës. Trupi juaj e prodhon këtë hormon kur niveli i glukozës në gjak fillon e bie.

Mund të keni edhe simptoma të tjera si:

- Irritim

- Dridhje

- Marrje mendsh

- Rrahje të shpeshta të zemrës

- Uri

- Lodhje

- Konfuzion dhe vështirësi në përqendrim

- Djersitje dhe ethe

- Dobësi dhe këputje trupore

Nëse nuk e korrigjoni menjëherë nivelin e glukozës në gjak, simptomat mund të përkeqësohen. Mund të keni:

- Shikim të turbulluar

- Problem me të folurën

- Konvulsione

- Humbje ndjenjash

Këto simptoma më serioze janë shumë të rrezikshme dhe kërkojnë trajtim emergjent. Familja juaj ose miqtë duhet të njihen me këto simptoma për të ditur si të veprojnë nëse ndodh të jenë afër jush.

Disa njerëz mund të kenë shenja të hipoglicemisë natën. Kjo mund të shkaktoj makthe, djersitje ose irritim kur të zgjoheni.

A mund të kemi hipoglicemi të pa shoqëruar me simptoma?


Shumë njerëz me nivel të ulët të glukozës në gjak nuk kanë simptoma. Kjo mund të ndodh, pas shumë episodeve të përsëritura të hipoglicemisë, në persona që kanë një periudhë të gjatë që trajtohen me diabet dhe tashmë nuk i vënë më re simptomat.

Ajo çka mund të ndihmoj në këto raste është matja e herëpashershme e nivelit të glukozës në gjak.

Si të veprojmë në rastin e hipoglicemisë?


Një mënyrë e shpejtë e menaxhimit të situatës është rregulli 15-15:

1. Hani 15 gram karbohidrate si një lugë kafe sheqer, lëng frutash, disa kokrra rrush të thatë, ose një karamele. Shmangni çokollatat dhe akulloret sepse nuk veprojnë shpejt në rritjen e nivelit te glukozës në gjak.
2. Prisni 15 minuta.
3. Kontrolloni nivelin e glukozës në gjak. Nëse vazhdon të jetë nën 70 mg/dl, ripërsëritni pikën 1.

    Kujdes të mos hani shumë – sepse niveli i glukozës në gjak mund të rritet. Përmbajuni rregullit të 15 gram në 15 minuta me kontrolle përkatëse të glukozës.

    Nëse niveli i glukozës në gjak është shumë i ulët dhe metoda 15-15 nuk funksionon mund të keni nevojë për glukagon – hormoni që rrit shpejt nivelin e glukozës në gjak. Diskutoni me mjekun tuaj nëse glukagoni duhet të jetë pjesë përbërëse e kutisë suaj të emergjencës.



    Lexo me shume:


    Shenjat e një diabeti të pakontrolluar