Kur bebet lindin, ka shumë gjëra të para që i presin: frymëmarrja e parë, prekja e parë etj. Por ndër të tjera, fëmija juaj i porsalindur duhet edhe të shpohet për herë të në thembër për të marr analizën e tij të parë të gjakut.

Për çfarë testohen bebet në lindje?


Përveç testit të dëgjimit dhe matjes së nivelit të oksigjenit në gjak me anë të një puls-oksimetri, nevojiten edhe disa analiza gjaku të cilat merren nga thembra e bebit. Kjo analizë shërben për një panel screening-u dhe tregon për sëmundje të rralla por serioze që mund të prekin shëndetin e të porsalindurit.

Screening-u për të porsalindurit i ka nisur hapat e tij të para që në vitin 1960, kur disa studiues zhvilluan një test për fenilketonurinë, një çrregullim aminoacidesh. Fëmijët me fenilketonuri duken plotësisht të shëndetshëm në lindje, por nëse çrregullimi i tyre nuk trajtohet, ata shfaqin më vonë vonesa në zhvillim. Me kohën, ky test dhe të tjera, iu shtuan panelit të analizave fillestare të bebit dhe u bënë popullore në shumë vende të botës. Ato kanë si qëllim kryesor të zbulojnë çrregullime të cilat nuk japin shenja dhe simptoma që në fillim te i porsalinduri por të cilat nëse diagnostikohen në kohë, mund të trajtohen me sukses.

Si dhe kur merret analiza?


Në përgjithësi, analiza merret në maternitet deri në 48 orët e para të lindjes së fëmijës. Por nëse në spitalin ku fëmija ka lindur nuk kryhen këto analiza, ju mund ta kryeni këtë analizë për bebin tuaj në klinika apo spitale të tjera ku mundësohet ky shërbim.

Analiza mund të merret nga një infermier, i cili me anë të një shpimi në thembër, merr disa pika gjak për ti dërguar në laborator për testim të mëtejshëm. Më pas, pediatri juaj do t`ju shpjegoj rezultatet e analizave.

Për çfarë çrregullimesh kryhet analiza?


Analiza mund të testojë për shumë sëmundje dhe çrregullime të lindura të të porsalindurit, ndër të tjera ato më të shpeshtat janë:

Hypotiroidizmi kongjenital primar
– një çrregullim hormonal në të cilin fëmija juaj nuk prodhon mjaftueshëm hormone të tiroides. Pa trajtim, ky çrregullim mund të shkaktoj vonesa në zhvillim dhe pengesë në rritje.

Fibroza cistike
– në këtë çrregullim, mukusi është më viskoz, çka shkakton mosfunksionim të organeve si mushkëria, mëlçia dhe zorrët. Nëse zbulohet herët, mjekët mund të ndihmojnë fëmijën të jetojë një jetë më të gjatë dhe të shëndetshme.

Pavarësisht çrregullimeve që depistohen, ky panel i ofron mundësinë të gjithë të porsalindurve të kenë një nisje sa më të mirë të jetës. Edhe pse këto çrregullime janë të rralla ato janë serioze për shëndetin. Zbulimi i hershëm i tyre ofron dhe shansin më të mirë të trajtimit.



Lexo më shumë:


5 mënyra si të rrisni sistemin imunitar të fëmijës për gjithë jetën